Salah sawios karesep simkuring nyaeta nonton wayang, naha bet resep nonton wayang? eta wayang teh mintonkeun sarupaning laku na jalmi, aya salah jeung bener, aya pangaweruh anu karasanateh lain mapatahan, tapi jadi enteung keur hirup urang sewang-sewang.

Kaleresan pun aki teh dalang, meureun karesep ieuteh nular, da ti aalit oge abdi mah osok nonton wengi-wengi bari eueut cikopi hideung.Biasana di tetengah pagelaran teh, aya sinden anu nyanyikeun kawih, tah dinten ieu simkuring bade ngabagikeun hiji lirik anu kuat pisan :

Sumanget urang berjuang

Wani tarung korban jiwa

Gumelar di pawenangan 

Seuer halangan haruang

Mun teu gaduh pamadegan

Leungiteun kamanusaan

Seueur pitnah tur pangrina

Nu tangtu, matak tugena

Teu kaur meunang tumiba

Teu weleh meunang musibah

Payus mun silih elingan urang Bandung

Pantes mun silih tulungan

Tandaning silih ajenan 

Dumasar kamanusaan

Mun hirup sewang-sewangan

Leupas tina kabeungkeutan

Moal panggih, kasemanget, 

Tantu nyorang kaancuran

Sangkan ngawujud harapan

Makmur dina kaadilan

Berjuang, ulah ijiran

Milari rido pangeran

Jadi initina, dina lirik eta ngelingan upami manusa di alam dunya, tantu bakal seueur halangan, tah nyanghareupan etateh kudu boga pamadegan atanapi prinsip, mun ninggalkeun eta, bisa jadi bakal leungit kamanusaan. Tah tidinya jelema mah nu utama silih elingan, tulungan jeung ajenan. Jeung anu paling penting tong sewang-sewangan bisi leupas tina kabeungkeutan. Nu akhirna berjuang tong kenal eleh, supaya bisa milari rido ti Gusti anu nyiptakeun bumi. Mugi peupeujeuh ieuteh bisa terus ku simkuring terapkeun.

Tutup lawang sigotaka